Людзі Слова ў няволі (28)
Пошук

Невядомы напаў на пісьменніка Салмана Рушдзі


Сёння адбыўся напад на вядомага пісьменніка, былога прэзідэнта ПЭНа Амерыкі Салмана Рушдзі
Мужчына, асоба якога пакуль не ўстаноўленая, напаў на пісьменніка перад ягонай лекцыяй у мястэчку Чаўтоква (штат Нью-Ёрк). Журналіст Associated Press паведаміў, што нападаючы прарваўся на сцэну адукацыйнага цэнтра Чаўтоква і 10-15 разоў ударыў 75-гадовага Рушдзі кулакамі і нажом.
«Міжнародны ПЭН рашуча асуджае жорсткі напад на Салмана Рушдзі. Салман з’яўляецца паважаным і знакамітым пісьменнікам і ганаровым членам ПЭН-супольнасці, які на працягу многіх гадоў сутыкаецца з пагрозамі за сваю працу. Ніхто не павінен быць мішэнню, не кажучы ўжо пра напады, за мірнае выказванне сваіх поглядаў. Жадаем нашаму дарагому сябру хутчэйшага выздараўлення. Нашы думкі з ім і ягонай сям’ёй»,
– заявіў прэзідэнт PEN International Бурхан Сонмез.
Брытанец індыйскага паходжання Салман Рушдзі – аўтар шматлікіх кніг, у тым ліку рамана «Сатанінскія вершы». Многія мусульмане палічылі гэтую кнігу блюзнерскай, і ў 1988 годзе вярхоўны лідэр Ірана аятала Хамейні выдаў фетву-ўказ забіць Рушдзі. За галаву пісьменніка, які жыве на Захадзе, адзін іранскі ісламскі фонд абяцае 3,3 млн долараў.