Распачынаецца новы прэміяльны сезон найбуйнейшай незалежнай узнагароды Беларусі – літаратурнай прэміі імя Ежы Гедройця, якая штогод уручаецца за найлепшую кнігу прозы, напісаную на беларускай мове. Сёлета ў прэміі ўдзельнічаюць кнігі, выдадзеныя ў 2024 годзе.
Журы ўжо вызначыла поўны спіс, у які ўвайшлі самыя гучныя, адметныя і нечаканыя празаічныя выданні апошняга года. Усе кнігі – на беларускай мове, усе – унікальныя і годныя ўвагі.
Поўны спіс намінантаў на літаратурную прэмію імя Ежы Гедройця 2025 года:
- «Мое баба – діректор морга» – Вольга Аполька (Голя з Ополя), самвыд
- «Самы цымус: смакі і водары беларуска-габрэйскай кухні» – Алесь Белы, выдавецтва «Gutenberg Publisher»
- «Ад двух да пятнаццаці. Мая мама ў турме» – Вольга Вялічка, выдавецтва «Gutenberg Publisher»
- «Вольнеры. Бясконцы дзень» – Валер Гапееў, выдавецтва «Янушкевіч»
- «Псіхараман. Уводзіны ў сучасную культуру» – Язэп Гніль, выдавецтва «Лысы Чэрап»
- «Гульні Цырцэі» – Зміцер Дзядзенка, фонд Kamunikat.org
- «Занзібар. Сталенне маладой душы» – Сяргей Дубавец, выдавецтва «Вясна»
- «Стагоддзе НН» – Сяргей Дубавец, выдавецтва «Вясна»
- «Сфагнумы» – Андрэй Дудко і Ветэраны карнай псіхіятрыі, платформа для электронных кніг «Smashwords»
- «Стрыжэ і піша» – Сяргей Календа, выдавецтва «Gutenberg Publisher»
- «Перамена месцаў» – Югася Каляда, выдавецтва «Пфляўбаўм»
- «Калі я выйду на волю» – Ганна Комар, выдавецтва «Skaryna Press»
- «Там, дзе няма цемнаты: Радыё Свабода» – Аляксандар Лукашук, выдавецтва «Вясна»
- «Апошняе пакаленне» – Макар, выдавецтва «Янушкевіч»
- «Жыццё ў дванаццаці апавяданнях» – Аляксей Правалоцкі, выдавецтва «Янушкевіч»
- «Залатое зерне» – Мечыслаў Ян Супрон, выдавецтва «Gutenberg Publisher»
- «Раз на дваццаць пяць тысяч гадоў» – Анка Упала, выдавецтва «Alena Kazlova»
- «Гвалт» – Аляксандр Чарнуха, выдавецтва «Янушкевіч»
- «Забойства на вуліцы Макаёнка» – Клёк Штучны, аўдыявыдавецтва «Audiobooks.by» і выдавецтва «Янушкевіч»
Журы прэміі
Журы літаратурнай прэміі імя Ежы Гедройця складаецца з вядомых літаратараў, перакладчыкаў, даследчыкаў і культурных дзеячаў, чыя кампетэнтнасць і розныя перспектывы забяспечваюць шматгранную ацэнку кніг.
Менавіта яны будуць вызначаць тыя творы, што найбольш ярка адлюстроўваюць літаратурную якасць, актуальнасць і сілу беларускага слова.
Сёлета сярод публічных асобаў у складзе журы: беларусістка, літаратуразнаўца, ад’юнкт кафедры беларусістыкі Варшаўскага ўніверсітэта Катажына Дрозд-Урбаньска; літаратуразнаўца, крытык, драматург, галоўны рэдактар навуковага часопіса «Studia Białorutenistyczne» Сяргей Кавалёў; паэт, перакладчык, літаратуразнаўца Андрэй Хадановіч.
Што такое прэмія імя гедройця 2025?
Заснаваная ў 2012 годзе, літаратурная прэмія імя Ежы Гедройця стала адной з найбольш прэстыжных узнагарод у беларускай культурнай прасторы. Яна не толькі адзначае творчыя дасягненні, але і фармуе вобраз сучаснай беларускай літаратуры – як мастацкай сістэмы, з’явы, вартасці.
Падрабязней пра постаць Ежы Гедройця — у нашым матэрыяле:
Ежы Гедройць: Я – апошні грамадзянін Вялікага Княства Літоўскага (ч. 1)
Ежы Гедройць: месца ў гісторыі і вечная павага (ч. 2)
Арганізатары прэміі
Прэмія арганізуецца Беларускім ПЭНам і Міжнародным саюзам беларускіх пісьменнікаў пры падтрымцы амбасады Рэспублікі Польшча ў Мінску і Польскага інстытута.
Сачыце за навінамі на сайтах арганізатараў penbelarus.org і bellit.info, а таксама ў сацыяльных сетках!