З радасцю абвяшчаем адкрыццё прыёму заявак на прэмію імя Ежы Гедройця за найлепшую арыгінальную кнігу, напісаную на беларускай мове ў жанрах мастацкай і дакументальнай прозы і выдадзеную ў 2023 годзе.
Намінаваць кнігі для ўдзелу могуць аўтары, выдавецтвы, творчыя аб’яднанні, культурніцкія інстытуцыі, літаратурныя СМІ, аргкамітэт прэміі і сябры журы.
Сёлета ў прэміі можна ўзяць удзел ананімна: дзеля бяспекі назва кнігі, імя аўтаркі ці аўтара, сябры ці сябра журы могуць быць зашыфраваныя. Нам важна, каб у прэміі маглі ўдзельнічаць усе кнігі, незалежна ад таго, па які бок мяжы знаходзяцца іх аўтаркі і аўтары.
Для ўдзелу неабходна запоўніць адпаведную форму.
Заяўкі прымаюцца да 4 ліпеня 2024 года ўключна.
Звяртаем увагу, што ў статуце прэміі адбыліся змены. Падрабязней азнаёміцца з новымі ўмовамі можна ў абноўленым статуце і рэгламенце.
Патрон прэміі – Ежы Гедройць, вядомы публіцыст, палітык і паслядоўны прыхільнік добрасуседскіх зносінаў паміж Польшчай і Беларуссю, Літвой, Украінай.
З 2012 года прэмія ўручаецца за найлепшую кнігу ў жанры мастацкай і дакументальнай прозы і на сённяшні дзень яна стала галоўнай незалежнай літаратурнай узнагародай Беларусі. Пераможцы апошніх трох гадоў – Ева Вежнавец з кнігай «Па што ідзеш, воўча?» (2021), Сяргей Абламейка з творам «Невядомы Менск. Гісторыя знікнення. Кніга першая» (2022), Ганна Кандрацюк з працай «У прысценках старога лесу. Гісторыі людзей з Белавежскай пушчы» (2023).
Арганізатары прэміі – Беларускі ПЭН і Міжнародны саюз беларускіх пісьменнікаў пры падтрымцы Амбасады Польшчы і Польскага інстытута ў Мінску.
Сачыць за навінамі прэміі можна на яе старонцы ў Facebook і Instagram і на сайтах арганізатараў. Дадатковыя пытанні пішыце на адрас [email protected].
Запрашаем да ўдзелу і зычым поспеху ўсім удзельнікам!