Сёлета ў журы прэміі Цёткі, якое будзе абіраць пераможцаў у намінацыях “Найлепшы твор для дзяцей і падлеткаў” і “Найлепшае мастацкае афармленне кнігі”, увайшлі:
Пісьменнікі і рэдактары
Пятро Васючэнка – пісьменнік, літаратуразнаўца, крытык, педагог, аўтар казак і п’ес для дзяцей “Прыгоды паноў Кубліцкага і Заблоцкага”, “Маленькі збраяносец” і інш.
Вера Жыбуль (Бурлак) – паэтка, перакладчыца, музыка, даследчыца літаратуры для дзяцей, аўтарка манаграфіі “Детская поэзия Серебряного века: модернизм”, перакладчыца казкі Льюіса Кэрала “Скрозь Люстэрка, і Што ўбачыла там Аліса”.
Вольга Мазурава – рэдактарка дзіцячага альманаха “Гарбузік”, сябра Таварыства беларускай школы.
Алена Масла – пісьменніца-казачніца, рэдактарка, драматург, лаўрэатка прэміі Васіля Віткі, прэміі “Залаты купідон”.
Андрэй Хадановіч – паэт, перакладчык, аўтар зборніка вершаў для дзяцей “Нататкі таткі”.
Мастакі
Васіліса Паляніна – мастачка, ілюстратарка кніг і часопісаў, аўтарка ілюстрацый да “Казак” братоў Грымаў.
Валерый Славук – мастак, ілюстратар, педагог, прафесар, аўтар ілюстрацый да кніг “Піліпка-сынок”, “Шляхціц Завальня, або Беларусь у фантастычных апавяданнях” Яна Баршчэўскага, “Чароўны свет” і інш., лаўрэат шэрагу прэмій, у тым ліку Дзяржаўнай прэміі Беларусі, заслужаны дзеяч мастацтваў Рэспублікі Беларусь, лаўрэат Спецыяльнай прэміі прэміі Прэзідэнта дзеячам культуры і мастацтва.
Павел Татарнікаў – мастак-графік, кніжны ілюстратар, выкладчык Беларускай дзяржаўнай акадэміі мастацтваў, пераможца шматлікіх конкурсаў і прэмій, лаўрэат Прэміі Цёткі 2017 за мастацкае афармленне кнігі Уладзіміра Арлова “Айчына: маляўнічая гісторыя”.
У кожнай намінацыі будзе вызначацца адзін пераможца, які атрымае грашовую ўзнагароду, эквівалентную 2000$. Падаць кнігу на прэмію можна да 31 студзеня 2018 года праз афіцыйны сайт ciotka.by.
Прэмія была заснаваная ў 2015 годзе Беларускім ПЭН-цэнтрам, фондам “Вяртанне” і Саюзам беларускіх пісьменнікаў. Папярэднія пераможцы прэміі: Надзея Ясмінска, аўтарка кнігі “Сем ружаў”, і Кацярына Дубовік – яе ілюстратарка (выдавецтва “Галіяфы”), а таксама Уладзімір Арлоў і Павел Татарнікаў з кнігай “Айчына: маляўнічая гісторыя. Ад Рагнеды да Касцюшкі”.