• Навiны
  • Нобелеўскую прэмію па літаратуры прысудзілі Алексіевіч

Нобелеўскую прэмію па літаратуры прысудзілі Алексіевіч

Апошняе абнаўленне: 8 кастрычніка 2015
Нобелеўскую прэмію па літаратуры прысудзілі Алексіевіч
Нобелеўскую прэмію па літаратуры за 2015 год атрымала беларуская пісьменніца і сяброўка Беларускага ПЭН-цэнтра Святлана Алексіевіч.

Нобелеўскую прэмію па літаратуры за 2015 год атрымала беларуская пісьменніца і сяброўка Беларускага ПЭНа Святлана Алексіевіч. Пра гэта паведаміла нязменны сакратар Шведскай акадэміі Сара Даніс. Аб’яўленне лаўрэата транслявалася ў жывым эфіры на афіцыйным сайце прэміі. Урачыстая цырымонія ўручэння ўзнагароды пройдзе 10 снежня ў Стакгольме.

Як паведамляе Lenta.ru, велічыня прэміі ў гэтым годзе склала восем мільёнаў шведскіх кронаў (953 тысяч долараў). Святлана Алексіевіч — 14-я жанчына, якая атрымала прэмію. Усяго было 112 лаўрэатаў.

Святлана Алексіевіч ужо некалькі гадоў узначальвала рэйтынгі найбуйнейшых букмекерскіх кантор Еўропы як найболей імаверная ўладальніца прэміі, паведамляе БелаПАН. Па ўяўленні Шведскага ПЭНа, яна намінавалася на Нобелеўскую прэмію па літаратуры з 2002 год за цыкл твораў “Голасы Утопіі”. Цыкл завяршыўся ў 2013 годзе кнігай “Час сэканд-хэнд”, усяго ў яго ўвайшло шэсць кніг, сярод якіх “У вайны не жаночы твар”, “Цынкавыя хлопчыкі”, “Зачараваныя смерцю”, “Апошнія сведкі” і “Чарнобыльская малітва”.

За свае літаратурныя працы Алексіевіч шматразова атрымлівала розныя ўзнагароды. Толькі за апошнія пяць гадоў ёй прысуджалі Літаратурную прэмію Цэнтральнай і Ўсходняй Еўропы “Ангелус” (Польшча, 2011), Прэмію мiру Саюза нямецкага кнігагандлю (Германія, 2013), Прэмію Медычы (Францыя, 2013), прэмію “Пяро волі” (Польшча, 2013), прыз чытацкіх сімпатый літпрэміі “Вялікая кніга” (Расія, 2014), двойчы — прэмію Рышарда Капусцінскага (Польшча, 2011 і 2014 гады). Алексіевіч носіць званне афіцэра ганаровага ордэна мастацтваў і літаратуры Французскай Рэспублікі.

Фаварытамі букмекерскіх кампаній сёлета былі беларуска Святлана Алексіевіч, модны японскі пісьменнік Харукі Муракамі, кенійскі пісьменнік Нгуі У Тхіонга, нарвежскі драматург Юны Фосу, амерыканскі класік Філіп Рот, аўстрыец Петар Ханку.

Нобелеўская прэмія — закрытага тыпу. Спіс прэтэндэнтаў і імя будучага ўладальніка ўзнагароды да апошняга моманту трымаецца ў сакрэце. Імёны кандыдатаў 2015 года могуць быць апублікаваныя толькі праз 50 гадоў.