Літаратурнае і мастацкае журы назвалі пераможцаў прэміі Цёткі за найлепшую кнігу для дзяцей і падлеткаў.
Цырымонія ўручэння адбылася сёння, 9 лістапада, на фестывалі PRADMOVA ў Познані.
Прэмія Цёткі прысуджаецца ў дзвюх намінацыях: за найлепшую аўтарскую кнігу для дзяцей і падлеткаў, напісаную на беларускай мове, а таксама за найлепшае мастацкае афармленне кнігі для дзяцей.
У 2023 годзе ў літаратурнай намінацыі перамогу падзялілі:
- Ева Вайтоўская за кнігу “Гарэзлівы пацалунак. Кніга 2” (выдавецтва “Янушкевіч”, 2023) – за смелую імправізацыю паводле японскага сюжэту і беларускі свет гарэзлівага юнацтва;
- Валер Гапееў за кнігу “Вольнеры. Прадвесце” (выдавецтва “Янушкевіч”, 2023) – за адкрыццё новай прасторы беларускага міфапаэтычнага космасу.
У мастацкай намінацыі перамагла Лізавета Лянкевіч за ілюстрацыі да кнігі Яна Бжэхвы “Акадэмія доктара Клякса” (выдавецтва “Папуры”, 2023) – за сучасны падыход да стварэння ілюстрацый і кніжнага афармлення.
У 2024 годзе ў літаратурнай намінацыі пераможцамі сталі:
- Альгерд Бахарэвіч за кнігу “Капітан Лятучая Рыба” (выдавецтва “Янушкевіч”, 2024) – за мастацкую трансфармацыю вобразу выгнання ў вялікае падарожжа насустрач свету;
- Эльга Папова за кнігу “Мора ў горадзе” (выдавецтва “Янушкевіч”, 2024) – за лёгкі і нязмушаны аповед пра мора, якое заўжды з табой.
У мастацкай намінацыі пераможцам стала зашыфраваны (-ая) ўдзельнік (-ца): Маргарыта Аніс за ілюстрацыі да кнігі Вераніка Юлляш “Розум, смеласць і добрае сэрца” (выдавецтва “Лубін”, 2024) – за ўдумлівы падыход да стварэння графічнага нарытыву ды імерсіўнага макету.
У літаратурнае журы прэміі Цёткі сёлета ўвайшлі: паэт, перакладчык, філолаг Андрэй Хадановіч; кніжная блогерка і папулярызатарка беларускай літаратуры Кацярына Жамойдзіна; культурная менеджарка, заснавальніца фонду “Кніжны вырай” Кацярына Веразуб. Астатнія сябры журы ўдзельнічаюць непублічна. Сярод публічных сябраў мастацкага журы – мастачка і ілюстратарка Лілія Бусарава, якая стала пераможцай прэміі ў 2022 годзе.
Арганізатарамі прэміі з’яўляюцца Дабрачынная ініцыятыва “Viartańnie”, Міжнародны саюз беларускіх пісьменнікаў і Беларускі ПЭН.
Сачыць за навінамі прэміі можна на старонцы ў Facebook, Instagram і на сайтах арганізатараў. Задаць пытанні пра прэмію можна, напісаўшы на [email protected].