Мы ведаем, як вы доўга чакалі! Мы таксама – і вось журы паэтычнай прэміі імя Наталлі Арсенневай за 2022 і 2023 гады разгледзела дасланыя заяўкі і зацвердзіла поўныя спісы намінаваных кніг.
Поўны спіс за 2022 год складаецца з усіх дасланых кніг, адпаведных тэхнічным крытэрыям:
- Альгерд Бахарэвіч, «Вершы», (выдавецтва «Viasna»)
- Ганна Комар, «Мы вернемся» (выдавецтва «Skaryna Press»)
- Наста Кудасава, «Побач» (выдавецкая ініцыятыва «Skarynyčy»)
- Марыя Мартысевіч, «Водападзел» (выдавецтва «Полацкія лабірынты»)
- Вальжына Морт, «Песні мёртвых і ўваскрэслых» (выдавецтва «Пфляўмбаўм»)
- Ганна Янкута, «Канстытуцыя» (фонд «Kamunikat.org»)
Паэтычная прэмія была заснаваная ў гонар Наталлі Арсенневай, выдатнай паэткі і зоркі літаратуры Заходняе Беларусі, аўтаркі знакавага верша «Магутны Божа», якая працягвала сваю дзейнасць на эміграцыі, уносячы неацэнны ўклад у захаванне і развіццё беларускай культуры і літаратуры. Арганізацыяй прэміі займаюцца Беларускі ПЭН і Міжнародны саюз беларускіх пісьменнікаў, якія выступаюць за падтрымку і развіццё беларускай літаратурнай традыцыі.
Нягледзячы на невялікую колькасць пазіцый, поўны спіс прэміі сабраў гучныя імёны, якія ведаюць усе аматары беларускай літаратуры. Канкурэнцыя высокая! Сачыце за навінамі і даведайцеся разам з намі пераможцу за 2022 год!