На кангрэсе Міжнароднага ПЭНу ў Маніле Святлана Алексіевіч абраная віцэ-прэзідэнткай гэтай арганізацыі, паведаміла старшыня Беларускага ПЭНу Таццяна Нядбай, якая бярэ ўдзел у кангрэсе.
Апрача Святланы Алексіевіч віцэ-прэзыдэнтамі былі абраныя таксама Архан Памук (Турэччына), Элена Панятоўска (Мексыка), Луіса Валенсуэла (Аргентына), Францыска Сіаніль (Філіпіны).
Кандыдатуру Святланы Алексіевіч прадстаўляла прэзыдэнтка Нямецкага ПЭНу Рэгула Вэнске, расказала Свабодзе Нядбай. Некалькі разоў з трыбуны Кангрэсу гучалі словы «Беларусь» і «беларуская пісьменніца», хаця і з пазначэннем, што піша на расейскай.
«Па-нашаму віцэ-прэзыдэнты — гэта інстытут ганаровых старшыняў, — расказала Нядбай Свабодзе. — Але ў нас ганаровым старшынём можна стаць толькі прайшоўшы прыступку старшыні, а ў Міжнародным ПЭНе „ганаровым“ можна стаць таксама і такім чынам — праз галасаванне дэлегатаў Кангрэсу. Ганаровыя старшыні сваім аўтарытэтам умацоўваюць аўтарытэт арганізацыі і такім чынам таксама „прамаўляюць“, што падзяляюць каштоўнасці і місію гэтых арганізацый — у дадзеным выпадку ПЭНу».
85-ы кангрэс Міжнароднага ПЭНу праходзіць у сталіцы Філіпінаў Маніле, на ім сабраліся больш за 200 чальцоў «Клубу паэтаў, эсэістаў і раманістаў».
Святлана Алексіевіч — сябра Беларускага ПЭНу ад 1989 году. У ліку ейных ўзнагарод прэмія ад Швэдскага ПЭНу — у 1996 годзе яе ўзнагародзілі «за адвагу і годнасць у літаратуры». У 2015 годзе Алексіевіч атрымала Нобелеўскую прэмію «за шматгалосную творчасць — помнік пакутам і адвазе ў наш час».