Беларускі ПЭН далучаецца да заявы PEN International наконт сябра Шведскага ПЭНа Жуакіма Медзіна.
«Пераследуючы Жуакіма Медзіна, грамадзяніна Швецыі, улады Турцыі відавочна спрабуюць задушыць замежную прэсу і запалохаць усіх журналістаў, каб прымусіць іх замаўчаць. Мы заклікаем улады неадкладна спыніць бязлітасныя рэпрэсіі супраць асноўных свабод — вызваліць Медзіна і ўсіх літаратараў, якіх утрымліваюць выключна за мірнае выказванне поглядаў», — заявіў Бурхан Сонмез, прэзідэнт PEN International.
29 красавіка 2025 года — Улады Турцыі павінны неадкладна вызваліць журналіста, пісьменніка і сябра PEN Sweden Жуакіма Медзіна і зняць з яго ўсе абвінавачанні, — заявілі сёння PEN International і PEN Sweden напярэдадні яго першага судовага слухання ў Анкары, што адбудзецца 30 красавіка. У выпадку асуджэння Медзіну пагражае доўгі турэмны тэрмін па сфабрыкаваных абвінавачваннях у абразе і тэрарызме.
Жуакім Медзін — пісьменнік і журналіст шведскай газеты Dagens ETC. Ён быў затрыманы паліцыяй 27 сакавіка 2025 года ў аэрапорце Стамбула пасля паездкі дзеля асвятлення агульнанацыянальных пратэстаў і арыштаваны на наступны дзень. Суд у Анкары ў далейшым адхіліў скаргу на пастанову аб яго арышце. Цяпер Медзін утрымліваецца ў турме строгага рэжыму Мармара ў Сіліўры, каля Стамбула. 1 красавіка ён перадаў зняволеным рукапісную нататку з пасланнем: «Журналістыка — гэта не злачынства, ні ў якой краіне».
Супраць Медзіна выстаўлена абвінавачанне ў «абразе прэзідэнта», што пагражае яму трыма гадамі пазбаўлення волі. Паводле дадзеных Асацыяцыі па вывучэнні СМІ і права (MLSA), якая прадстаўляе Медзіна, гэтае абвінавачанне звязана з публікацыямі ў сацсетках, што тычыліся пратэсту 2023 года ў Стакгольме, падчас якога пудзіла прэзідэнта Рэджэпа Таіпа Эрдагана было павешана за ногі. Медзін адмаўляе ўсе абвінавачанні, патлумачыўшы пракурорам, што асвятляў падзею ў межах прафесійнай журналісцкай працы. Арганізатары пратэсту неадкладна пацвердзілі яго словы.
Супраць Медзіна таксама выстаўлены асобныя абвінавачанні ў «удзеле ў тэрарыстычнай арганізацыі» і «распаўсюдзе тэрарыстычнай прапаганды», за што прадугледжана шматгадовае пазбаўленне волі. У другой абвінаваўчай выснове, у прыватнасці, згадваюцца яго матэрыялы для Dagens ETC, паведамленні ў сацсетках, а таксама змест яго кніг, у тым ліку «Кобане — Курдская рэвалюцыя і барацьба супраць ІД» (Kobane – Den kurdiska revolutionen och kampen mot IS, выдадзеная ў 2016 годзе), заснаваная на яго журналісцкай паездцы ў Сірыю — што, паводле пракуратуры, з’яўляецца «даказам яго сувязяў з тэрарыстычнай арганізацыяй».
«Свабода выказвання ў Турцыі жорстка рэпрэсаваная, і колькасць зняволеных пісьменнікаў і журналістаў — трывожна высокая. Зараз надзвычай важна, каб Жуакім Медзін атрымаў справядлівы суд, які пакажа: журналістыка — гэта не злачынства», — заявіла Керстын Альмегорд, прэзідэнтка PEN Sweden.
Першае слуханне ў справе аб «абразе» прызначана на 30 красавіка ў 79-м крымінальным судзе першай інстанцыі ў Анкары. Медзін, як чакаецца, дасць паказанні праз відэасувязь. Дата слухання ў «тэрарыстычнай» справе пакуль не прызначана. PEN International і PEN Sweden заклікаюць спыніць абедзве справы супраць Медзіна і неадкладна і безумоўна яго вызваліць.
PEN International таксама паўтарае свой заклік да ўладаў Турцыі неадкладна забяспечыць правы на свабоду выказвання, доступ да інфармацыі і мірны пратэст, а таксама вызваліць усіх, хто затрыманы па неабгрунтаваных падставах.
Салідарнасць
Далучыцеся да кампаніі PEN Sweden і дашліце словы салідарнасці Жуакіму Медзіну і ягонай сям’і праз гэтую анлайн-форму: https://www.svenskapen.se/solidaritetshalsning-joakim-medin