Сумесная заява прадстаўнікоў беларускай праваабарончай супольнасці
24 верасня 2024 г.
У сувязі з павелічэннем колькасці выпадкаў асуджэння і пазбаўлення волі грамадзянаў краіны па шэрагу дыфамацыйных артыкулаў Крымінальнага кодэкса Рэспублікі Беларусь, а таксама ў сувязі са знявагай дзяржаўных сімвалаў Рэспублікі Беларусь ды і іншымі дзеяннямі, накіраванымі на правамерную реалізацыю свабоды выказвання меркаванняў, мы, прадстаўнікі беларускай праваабарончай супольнасці патрабуем спыніць пераслед правамерных форм выказвання меркаванняў, і ў чарговы раз пацвярджаючы свае неаднаразова выказаныя патрабаванні па дэкрыміналізацыі дыфамацыі і недапушчальнасці пазбаўлення волі грамадзян за абразу службовых асобаў, дзяржавы, дзяржаўных органаў і сімвалаў (супольная заява ад 22 снежня 2020 г.), адзначаем наступнае:
Намі атрыманая інфармацыя пра наступных асобаў, пазбаўленых волі за абразу А.Лукашэнкі, прадстаўнікоў улады (супрацоўнікаў міліцыі), суддзяў і знявагу дзяржавы і дзяржаўных сімвалаў, іншыя формы рэалізацыі свабоды мяркаванняў:
Раман Гралеўскі змешчаны пад варту па арт.368 і 369 КК за абразу А.Лукашэнкі і службовай асобы;
Сяргей Козікаў асуджаны па арт. 367 Крымінальнага кодэкса за паклёп у дачыненні да А.Лукашэнкі да аднаго году і 6 месяцаў пазбаўлення волі ў калоніі;
Аляксандр Зубкоў асуджаны па арт. 367 Крымінальнага кодэкса за паклёп у дачыненні да А.Лукашэнкі да двух гадоў пазбаўлення волі ў калоніі;
Аляксандр Сацюк асуджаны па арт.368 і 369 КК за абразу А.Лукашэнкі і службовай асобы да пазбаўлення волі ў калоніі;
Сяргей Паспелаў асуджаны па арт.368 КК за абразу А.Лукашэнкі і службовай асобы да аднаго году і 6 месяцаў пазбаўлення волі ў калоніі.
Мы лічым пераслед і пазбаўленне волі названых асоб палітычна матываваным, звязаным з мірнай рэалізацыяй выказвання меркавання, а іх саміх палітычнымі зняволенымі ў адпаведнасці з п. 3.1(а) Кіраўніцтва па вызначэнні паняцця “Палітычны зняволены”, і патрабуем ад уладаў Беларусі:
Неадкладна вызваліць палітвязняўРамана Гралеўскага, Сяргея Козікава, Аляксандра Зубкова, Аляксандра Сацюка, Сяргей Паспелаў і спыніць крымінальны пераслед у дачыненні да іх.
Прыняць захады, скіраваныя на дэкрыміналізацыю дыфамацыйных правапарушэнняў і адмену артыкулаў Крымінальнага кодэкса, якія прадугледжваюць адказнасць за абразу дзяржавы, дзяржаўных сімвалаў і службовых асобаў, а менавіта – арт. 188, 367, 368, 369, 369-1, 370, 391 Крымінальнага кодэкса Рэспублікі Беларусь, і спыніць усе раней узбуджаныя па дадзеных артыкулах крымінальныя справы.
Неадкладна вызваліць усіх палітычных зняволеных і спыніць палітычныя рэпрэсіі супраць грамадзян краіны.
Праваабарончы цэнтр “Вясна”;
Прававая ініцыятыва;
Lawtrend;
Human Constanta;
Беларускі ПЭН;
Беларускі Хельсінкскі Камітэт.