Дзе ўзяць грошы на свой праект, творчую паездку ці выданне кнігі? Зрабілі падборку фінансавых магчымасцяў для літаратарак і літаратараў.
Краўдфандынгавая платформа «Gronka»
Пачала сваю працу новая краўдфандынгавая платформа «Gronka» для беларусак і беларусаў. На ёй можна сабраць грошы на выданне сваёй кнігі. Платформа працуе з двума варыянтамі збораў — «Усё або нічога» і «Усё, што ёсць». «Gronka» не спаганяе камісіі з крэатараў і іх спонсараў, але невялікую камісію (3-5 %) забірае плацежны сэрвіс «Stripe», праз які працуе платформа.
На платформе «Gronka ужо з’явіліся зборы ад выдавецтва «Янушкевіч», «Этна-традыцыі», Аляксандра Чарнухі ды іншых.
Праграма мабільнасці «Artpower Belarus»
Рэсурсны цэнтр Беларускай Рады культуры ў супрацы з Дацкім інстытутам культуры адкрывае дадатковы прыём заявак на фінансаванне творчых паездак.
Агульная мэта конкурсу – падтрымаць мабільнасць, якая паспрыяе наладжванню міжкультурных адносін, адкрые доступ для новых магчымасцяў ці дапаможа развіць прафесійныя навыкі.
У рамках гэтага конкурсу вы можаце падаць заяўку на падтрымку мабільнасці, звязанай з творчасцю. Яе працягласць можа складаць ад некалькіх дзён да двух месяцаў. Сярэдняя даступная сума – 2000 еўра на чалавека.
Старт мабільнасці: з 1 верасня 2024 года.
Апошні тэрмін завяршэння мабільнасці: 31 кастрычніка 2024 года.
Дэдлайн: 6 жніўня.
Culture Moves Europe
Праграмы мабільнасці для творцаў і дзеячаў культуры, легалізаваных у ЕС. Праграма ахоплівае галіны архітэктуры, культурнай спадчыны, дызайну і моды, літаратуры, музыкі, выканаўчых і візуальных мастацтваў.
З 1 жніўня можна падаваць заяўку на гранты індывідуальнай мабільнасці. Праграма прапануе фінансавую падтрымку для:
- рэалізацыі праекта з міжнародным партнёрам, напрыклад, з іншым мастаком, арганізацыяй, культурніцкай пляцоўкай і г. д.;
- падарожжаў ад 7 да 60 дзён для аднаго чалавека або ад 7 да 21 дня для груп да пяці чалавек;
- выдаткаў на падарожжы і пражыванне, а таксама дадатковых індывідуальных выплат у залежнасці ад праекта і асабістай сітуацыі.
Сачыць за стартам збору заявак можна тут.
Гранты на культурніцкія праекты для квір-бежанак і квір-бежанцаў
Quarteera e. V. пры падтрымцы Міністэрства замежных спраў Германіі ў межах праграмы «Civil Society Cooperation» запрашае квір-дзеячаў і дзяячак мастацтва, якія знаходзяцца ў змушанай эміграцыі, прыняць удзел у конкурсе культурніцкіх праектаў.
Да ўдзелу ў конкурсе запрашаюцца квір-мігранткі і мігранты з Беларусі, Расіі і Украіны, якія маюць досвед працы ў сферы мастацтва і культуры.
На падставе конкурсу будзе падтрымана 15 праектаў грантамі ад 1000 да 5000 еўра. Праекты могуць быць рэалізаваны на тэрыторыі Арменіі, Германіі, Грузіі і Малдовы з 1 верасня па 1 снежня 2024 года. Тэма праектаў: досвед квір-бежанства.
Дэдлайн: 12 жніўня.