25 кастрычніка мы даведаемся імя пераможцы прэміі за найлепшы дызайн кніжнай вокладкі. Яно будзе абвешчана падчас вялікага канцэрту фестывалю «Бардаўская восень» у Бельску-Падляшскім 25 кастрычніка:
25 кастрычніка, пачатак канцэрта а 17:00.
Бельскі Дом Культуры, Бельск Падляшскі, Польшча.
Уваход вольны.
Кароткі спіс фіналістаў сёлетней прэміі даступны тут.
Пра прэмію
Прэмія імя Міхала Анемпадыстава ўшаноўвае спадчыну выбітнага беларускага мастака, дызайнера і культуролага, які значна паўплываў на развіццё візуальнай культуры Беларусі. Заснаваная ў 2019 годзе, яна адзначае найлепшыя дызайнерскія рашэнні ў афармленні кніжных вокладак.
У розныя гады ў прэміі перамагалі: Грыгорый Кацнэльсон («Віленскі покер»), Алена Дашкевіч («Простыя словы. Міхал Анемпадыстаў»), Анатоль Лазар («(Не)расстраляныя»), Яна Галушкіна і лічбавы архіў VEHA («Людзі Лесу / Ludzi Lesu»), Святлана Дземідовіч і Лукаш Левандоўскі («Побач»).
Арганізатары прэміі — Беларускі ПЭН і фонд «Open Culture» пры падтрымцы партнёраў: ТАА «H&L», кампаніі «Laut» і фестывалю «Бардаўская восень».
Сачыце за навінамі — даведаемся разам, хто атрымае бронзавага анёла за новы подых у дызайне беларускай кнігі!
Праект фінансуецца ў рамках Нацыянальнага плану аднаўлення Міністэрства фондаў і рэгіянальнай палітыкі Рэспублікі Польшча.