Беларускі ПЭН абвяшчае набор на трэці сезон Перакладчыцкай майстэрні — і ён будзе яшчэ больш паглыбленым, насычаным і прафесійна арыентаваным!
У гэтым сезоне мы вельмі чакаем тых, хто хоча сур’ёзна займацца перакладамі і супрацоўнічаць з выдавецтвамі. Запрашаем у тым ліку і выпускніц ды выпускнікоў папярэдніх сезонаў, каб яны далей удасканальвалі сваё майстэрства.
У чым асаблівасць гэтага сезона?
Мы папрасілі беларускія выдавецтвы, якія працуюць з перакладамі, падзяліцца фрагментамі кніг, што плануюцца да выдання. Гэта значыць, што ўжо на этапе падачы заяўкі вы пачняце працаваць з мастацкімі тэкстамі, якія маюць рэальны шанц з’явіцца ў друку.
У гэтым сезоне мы чакаем актыўнага ўдзелу і наведвання ўсіх сустрэч, каб вы змаглі ўзяць ад курса ўсё, што мы вам можам прапанаваць.
- Каб трапіць у майстэрню, трэба перакласці адзін з прапанаваных фрагментаў (да 3 старонак) і даслаць яго разам з заяўкаю. У выпадку, калі сярод прапанаваных фрагментаў адсутнічае мова, з якой вы можаце перакладаць, або вы не адчуваеце, што прапанаваны спіс адпавядае вашым інтарэсам ды досведу, запрашаем падаваць пераклады твораў, што цікавяць менавіта вас (таксама да 3 старонак).
- У вас будзе тры тыдні, каб спакойна і якасна падрыхтавацца і падаць заяўку.
- Чакайце ліста ад нас з вынікамі адбору. Колькасць удзельнікаў ды ўдзельніц абмежаваная.
Што чакае тых, хто пройдзе адбор?
Гэта будзе больш, чым базавы курс. Вы зможаце паляпшаць і шліфаваць ваш пераклад пад кіраўніцтвам вопытных майстраў — вядомых перакладчыкаў і перакладчыц.
Па заканчэнні майстэрні гатовыя пераклады будуць прадстаўлены выдавецтвам. Наша мэта — стварыць умовы для вашага прафесійнага росту і дапамагчы перакладам знайсці шлях да выдаўцоў.
Сустрэчы будуць адбывацца анлайн на платформе ZOOM у траўні – ліпені раз на тыдзень чацвяргамі, з 18:00 да 20:00 беларускага часу.
Усе тэксты для перакладу даступныя ў дакуменце па спасылцы. Гатовы варыянт або варыянты перакладу разам з арыгінальным тэкстам прымацуйце ў гугл-форме.
Запоўніць заяўку
Дэдлайн падачы заяўкі з перакладамі — да 20 красавіка 2025 года ўключна.
Чакаем вас у новым сезоне!