Мы, прадстаўнікі беларускай праваабарончай супольнасці, у сваёй Сумеснай заяве ад 21 красавіка 2022 года рашуча асудзілі атаку на незалежны прафсаюзны рух, прадстаўнікі якога зазналі ператрусы і арышты.
Паводле нашых звестак, на сённяшні дзень у зняволенні з розных надуманых прычынаў адвольна ўтрымліваюцца ў якасці падазраваных і абвінавачаных:
Аляксандр Ярашук, старшыня Беларускага кангрэсу дэмакратычных прафсаюзаў (БКДП); Сяргей Антусевіч, намеснік старшыня БКДП; Генадзь Фядыніч, лідар прафсаюзу РЭП; прафсаюзныя актывісты Вацлаў Арэшка, Міхаіл Громаў, Ірына Буд-Гусаім, Міраслаў Сабчук, Яніна Малаш, Віталь Чычмароў, Васіль Бераснёў.
Пазбаўленне волі паказаных асобаў адбылося на фоне шырокамаштабнай кампаніі пераследу незалежных прафсаюзаў і прафсаюзных лідараў апошнім часам і носіць сістэмны характар. Так, 7 красавіка стала вядома пра тое, што КДБ прызнаў «Беларускі незалежны прафсаюз РЭП» экстрэмісцкім фармаваннем, а 11 траўня Гродзенскі абласны суд, згодна з заявай пракурора Гродзенскай вобласці, прыняў рашэнне аб прызнанні пярвічнай арганізацыі Беларускага незалежнага прафсаюзу работнікаў ААТ «Гродна Азот» экстрэмісцкай, забароне яе дзейнасці і ліквідацыі з неадкладным выкананнем судовага рашэння.
У сувязі з гэтым мы лічым іх пераслед і пазбаўленне волі палітычна матываванымі, звязаным з негвалтоўным ажыццяўленнем свабоды выказвання меркаванняў, свабоды мірных сходаў і асацыяцый, а таксама праз негвалтоўную дзейнасць, накіраваную на абарону правоў чалавека і асноўных свабод, а іх саміх у адпаведнасці з п.п. 3.1, 3.2 Кіраўніцтва па вызначэнні паняцця «палітычны зняволены», — палітычнымі зняволенымі, і патрабуем ад улад Беларусі:
- Неадкладна вызваліць палітзняволеных Аляксандра Ярашука, Сяргея Антусевіча, Генадзя Фядыніча, Вацлава Арэшку, Міхаіла Громава, Ірыну Буд–Гусаім, МіраславаСабчука, Яніну Малаш, Віталя Чычмарова, Васіля Бераснёва і спыніць крымінальны пераслед у дачыненні да іх.
- Неадкладна вызваліць усіх палітычных зняволеных і спыніць палітычныя рэпрэсіі супраць грамадзян краіны.
Праваабарончы цэнтр «Вясна»;
Прававая ініцыятыва;
Беларускі ПЭН;
Lawtrend;
Беларускі дом правоў чалавека імя Барыса Звозскава;
Беларуская асацыяцыя журналістаў.