Павел Севярынец

Апошняе абнаўленне: 11 лістапада 2021
Павел Севярынец
Надзеі Гацак
Эсэіст, празаік, публіцыст, грамадскі дзеяч.

Сябра Саюза беларускіх пісьменнікаў.

Аўтар кніг «Пакаленне Маладога Фронту» (2002), «Нацыянальная ідэя» (2005), «Лісты з лесу» (2007), «Брату» (2007), «Люблю Беларусь» (2008), «Беларуская глыбіня» (2014), «Беларуская Хрысціянская Дэмакратыя: 1917-2017» (2017), «Сто асоб беларускай хрысціянскай дэмакратыі» (2017), «Беларусалім. Золак» (2017). «Каменнае сэрца» (2019, у серыі «Турэмная літаратура»), «Беларусалім. Сэрца Святла» (выйшаў у чэрвені 2020 года; прэзентацыя прайшла без аўтара, бо на той час ён месяц знаходзіўся за кратамі).

За кнігу «Беларуская глыбіня» (2014) — лаўрэат прэміі Францішка Аляхновіча, заснаванай Беларускім ПЭН-Цэнтрам сумесна з Радыё Свабода за найлепшы твор, напісаны ў зняволенні.

За публіцыстычны цыкл «Лісты з лесу» (2007) — лаўрэат прэміі імя Алеся Адамовіча, заснаванай Беларускім ПЭН-Цэнтрам.

Раман «Беларусалім. Золак» (2017) у 2018 годзе ўвайшоў у кароткі спіс прэміі імя Ежы Гедройца.

Першы раз па палітычыных матывах быў арыштаваны 2 красавіка 1998 года падчас апазіцыйнай маніфестацыі ў Мінску і за «зрыў канцэрта, прысвечанага аб’яднанню Расіі і Беларусі», змешчаны ў СІЗА. Праз два месяцы пад ціскам беларускай і міжнароднай грамадскасці вызвалены і адпраўлены пад падпіску аб нявыездзе ў Віцебск. Крымінальная справа закрытая ў лістападзе 1998 года. У 2005 годзе абвінавачаны ў арганізацыі акцыяў пратэсту супраць «трэцяга тэрміну Лукашэнкі», якія адбыліся ў Мінску пасля «рэферэндуму-2004» 18 і 19 кастрычніка. Асуджаны да трох гадоў абмежавання волі (г. зв. «хіміі»), з улікам амністыі тэрмін скарочаны да двух гадоў. Адбываў пакаранне на лесанарыхтоўках у вёсцы Малое Сітна, дзе напісаў кнігу «Лісты з лесу». У снежні 2010 года, падчас масавай акцыі супраць фальсіфікацыі выбараў («Плошча»), арыштаваны. Пяць месяцаў адбыў у турме КДБ, а затым два гады і два месяцы — у спецкамендатуры ў вёсцы Куплін Пружанскага раёна, дзе напісаў кнігу «Беларуская глыбіня». У той час прызнаны палітвязнем. Вызвалены ў кастрычніку 2013 года.

7 чэрвеня 2020 года Павел Севярынец быў затрыманы ў Мінску пасля таго, як правёў на плошчы перад Камароўскім рынкам «народны пікет свабоды і салідарнасці» побач з пікетамі па зборы подпісаў за вылучэнне альтэрнатыўных кандыдатаў у прэзідэнты. 21 жніўня Севярынец павінен быў выйсці на волю пасля 75 сутак адміністрацыйнага арышту. Але ў дачыненні да Паўла Севярынца было выстаўленае абвінавачанне па ч. 2 арт. 293 Крымінальнага кодэкса (удзел у масавых беспарадках), яго пакінулі пад вартай.

25 траўня 2021 года Магілёўскі абласны суд прыгаварыў Паўла Севярынца да сямі гадоў пазбаўлення волі ў калоніі ўзмоцненага рэжыму. Суд праходзіў у закрытым рэжыме.

10 ліпеня 2020 года прызнаны палітвязнем.

23 сакавіка 2022 г. палітвязня дадалі ў «Пералік асобаў, датычных да экстрэмісцкай дзейнасці».

У красавіку 2022 г. адміністрацыя папраўчай калоніі № 17 прызнала лідара Беларускай Хрысціянскай дэмакратыі «злосным парушальнікам рэжыму». Тады яму скарацілі дазволеную колькасць званкоў дадому і грашовых пераводаў. У чэрвені Севярынец паведаміў родным, што яго пазбавілі і працяглага спаткання.

21 чэрвеня 2023 года ў Шклове ў ПК (папраўчай калоніі) №17 адбыўся суд па замене рэжыму ўтрымання Паўлу Севярынцу. Суд пастанавіў перавесці Паўла Севярынца на турэмны рэжым тэрмінам на тры гады.

Адрас для ліставання: Севярынцу Паўлу Канстанцінавічу, 213004, вул. 1-я Заводская, д. 8, ІК 17, атрад 17, г. Шклоў, Магілёўская вобл.

П. Севярынец. Беларусалім. Кніга другая: Сэрца святла. 2020

П. Севярынец. Каменнае сэрца. Мінск, 2018

П. Севярынец. Беларуская Хрысціянская Дэмакратыя. Мінск, 2017

П. Севярынец. Беларусалім. Кніга першая: Золак. 2017

П. Севярынец. Люблю Беларусь. Менск, 2008

П. Севярынец. Нацыянальная ідэя. Рыга, 2007

П. Севярынец. Лісты зь лесу. Вільня, 2007

П. Севярынец. Брату. Менск, 2007

П. Севярынец. Пакаленьне Маладога Фронту. 2002