Людзі Слова ў няволі (19)
Пошук

Мікола Папека


Фота: з асабістага архіву
Паэт, пчаляр, заснавальнік літаратурнай «Мядовай прэміі», грамадскі актывіст.

Сябра Саюза беларускіх пісьменнікаў.

У 1999 годзе выдаў зборнік вершаў «Чарнавікі» з прадмовай Міколы Купрэева. За выхад кнігі аўтар выказаў падзяку сваім «двухкрылым фундатарам — пчолам». Друкаваўся ў часопісе «Крыніца», штотыднёвіку «Літаратура і мастацтва», абласной і раённай перыёдыцы.

За зборнік «Чарнавікі» ў 2000 годзе быў уганараваны прэміяй «Гліняны Вялес-99».

У 2001 годзе заснаваў штогадовую «Мядовую прэмію» (пуд мёду). Лаўрэатамі прэміі могуць стаць толькі звязаныя з Брэстчынай літаратары.

Міколу Папеку затрымалі 30 лістапада дома ў вёсцы Лінова Пружанскага раёна.

Пра гэта з’явіліся паведамленні ад сяброў і паплечнікаў паэта ў сацыяльных сетках. Паводле іх, адбылося гэта ў 06:45 раніцы 30 лістапада, пасля чаго Міколу Папеку павезлі ў Брэст.

На допыце ў ізалятары Мікола Папека не сведчыў супраць сабе на падставе артыкула 27 Канстытуцыі Рэспублікі Беларусь, гаварыў па-беларуску, патрабаваў перакладчыка, а таксама — каб дакументы следчых былі аформлены па-беларуску. «Я ўсё ж перакладчыка дабіўся. Аказалася, што знайсці перакладчыка ў Брэсце — вялікая складанасць», — паведаміў пасля вызвалення сам Мікола Папека. У той раз Мікола Папека вярнуўся дадому пасля трох сутак у ізалятары.

8 чэрвеня 2021 года Мікола Папека асуджаны да 2 гадоў «хіміі» па «карагоднай справе» (арт. 342, ч. 1 і арт. 75, ч. 1). «Карагодная справа» — адна з самых маштабных крымінальных спраў, звязаных з паслявыбарнымі акцыямі пратэсту ў Брэсце. 13 верасня ў Брэсце адбывалася шэсце ў знак пратэсту супраць фальсіфікацыі выбараў і гвалту. Удзельнікі мірнай акцыі пратэсту выйшлі на скрыжаванне праспекта Машэрава і бульвара Касманаўтаў. Людзі спявалі песні, вадзілі карагоды, пакуль не прыехаў вадамёт, супрацоўнікі міліцыі пачалі затрымліваць пратэстоўцаў.

З 12 верасня 2021 года Мікола Папека адбывае пакаранне ў папраўчай установе адкрытага тыпу ў Мазыры. Яго хадайніцтва аб накіраванні ва ўстанову адкрытага тыпу ў в. Куплін, якая знаходзіцца ў некалькіх кіламетрах ад яго роднага дома, было адхілена ўладамі.

16 верасня 2021 года прызнаны палітвязнем.

Адрас для ліставання: Папеку Мікалаю Мікалаевічу, 247783, бульвар Юнацтва, д. 24, г. Мазыр, Гомельская вобласць, Беларусь.