2020-2022

ліквідаваныя арганізацыі культуры

На гэтай старонцы сабрана інфармацыя пра беларускія арганізацыі, якія дзейнічалі ў галіне культуры. У некаторых з іх культура была асноўным напрамкам, у іншых - адным з накірункаў. Але ўсе гэтыя арганізацыі аб'ядноўвае тое, што яны патрапілі пад каток рэпрэсій супраць грамадзянскай супольнасці. Мы стварылі гэтую старонку, каб даробак ліквідаваных арганізацый не быў страчаны.

Даведка:
Рэгістрацыя – 12.10.2011
Ліквідацыя – 27.07.2021
Рашэнне прынята: ГУЮ Мінгарвыканкама

Інфармацыйна-асветніцкая ўстанова "Амарока" – была адной з папулярных пляцовак Мінска сярод тых, хто цікавіцца беларускай культурай. Дзейнічала ў сферах музыкі і тэатра, арганізоўвала культурніцкія івэнты, падтрымлівала беларускамоўныя праекты на любую тэму.

Дзякуй Арт Сядзібе за:

Мова Фэст, які сабраў на адной пляцоўцы больш за 6 тысяч чалавек і аб'яднаў у святкаванні Дня роднай мовы бізнес, грамадскія ініцыятывы, культурных дзеячаў.
Два вялікія фестывалі культуры "Дзень вышыванкі", на якіх былі сабраныя брэнды і рамеснікі з усёй Беларусі, з адукацыйнай часткай і музыкай у праграме.
Кнігу "Беларускамоўныя", якая стала для многіх дапаможнікам па пераходзе на беларускую мову: парады, прапановы і гісторыі людзей, якія ўжо перайшлі на беларускую.
Квізы, настольныя гульні па-беларуску, якія сталі новай формай беларусізацыі.
Тысячы канцэртаў: ад кватэрнікаў да буйных фэстаў.
Конкурсы: паэтычны "Рухавік", які стаў для многіх маладых паэтаў першай пляцоўкай, – іх вершы ацанілі знакамітыя сучасныя паэты; музычныя: "Мова. Музыка. Футбол", якія прынеслі ў спорт беларускую мову.

Даведка:
Рэгістрацыя – 16.11.1990
Ліквідацыя – 09.08.2021
Рашэнне прынята: Вярхоўны суд РБ
Зарэгістраваны ў Польшчы як асацыяцыя (stowarzyszenie) – 07.07.2022

РГА "Беларускі ПЭН-цэнтр" накіроўвала сваю дзейнасць на літаратараў, перакладчыкаў і даследчыкаў літаратуры, публіцыстаў, інтэлектуалаў, тых, хто ствараў і пашыраў культуру, бараніў слова і яго майстроў. А таксама на праваабаронцаў і стэйкхолдараў, якія займаюцца пытаннямі беларускай літаратуры, культуры, правоў чалавека.

Арганізацыя падтрымлівала развіццё беларускай літаратуры і культуры. Спрыяла рэалізацыі патэнцыялу творцаў. Фармавала спрыяльнае асяроддзя для творчай дзейнасці. Займалася адукацыйнай дзейнасцю, а таксама праваабаронай у сферы культуры. Праводзіла літаратурныя прэміі, курсы крэатыўнага пісьма, майстар-класы для маладых літаратараў, перакладніцкую майстэрню, рэзідэнцыі, маніторынг парушэнняў правоў чалавека ў дачыненні да дзеячаў культуры і культурных правоў.

Пасля ліквідацыі арганізацыя атрымала рэгістрацыю як НДА ў Польшчы і працягвае сваю дзейнасць.

Дзякуй Беларускаму ПЭНу за:

Літаратурныя прэміі імя Алеся Адамовіча, Францішка Багушэвіча, Ежы Гедройця, Наталлі Арсенневай, Карласа Шэрмана, Міхала Анемпадыстава, "Дэбют" імя Максіма Багдановіча ды інш.
Фестывалі "Вандроўны Фэст Караткевіча", PRADMOVA.
Аўдыятэку: https://audio.penbelarus.org/
Творчыя рэзідэнцыі. Пры падтрымцы БДПЧ Беларускі ПЭН арганізоўваў Рэзідэнцыю маладога літаратара ў Вільні. Пасля 2020 арганізаваў некалькі рэзідэнцый для рэпрэсаваных дзеячаў культуры (як унутры Беларусі, так і па-за межамі).
Адукацыйныя праекты "Перакладніцкая майстэрня", майстар-класы для маладых літаратараў, школу крэатыўнага пісьма Адама Глобуса "Літара".
Маніторынг у сферы культуры, на падставе якога кожныя два тыдні публікуюцца хронікі парушэнняў правоў, а таксама аналітычныя справаздачы.
За падтрымку знакамітых сябраў Беларускага ПЭНа: Нобелеўскай лаўрэаткі па літаратуры Святланы Алексіевіч і лаўрэата Нобелеўскай прэміі міру Алеся Бяляцкага, які зараз палітзняволены.

Даведка:
Рэгістрацыя – 19.06.1991
Ліквідацыя – 10.11.2021
Рашэнне прынята: Вярхоўны суд РБ
Суддзя: Р. І. Філіпчык

У статутных дакументах Грамадскага аб'яднання БНФ "Адраджэньне" у якасці мэтаў арганізацыі пазначана ўсталяванне дэмакратычнага грамадства, пабудова дэмакратычнай праўнай дзяржавы, адраджэнне беларускай нацыі на прынцыпах дэмакратыі і гуманізму, развіццё культуры карэннай нацыянальнасці ды ўсіх нацыянальных супольнасцяў на Беларусі.

Дзякуй ГА БНФ "Адраджэньне" за:

Удзел у арганізацыі цягам 30 гадоў бадай што пераважнай большасці культурніцкіх, краязнаўчых, палітычных акцый і кампаніяў патрыятычнай скіраванасці, самыя важкія з якіх ініцыявалі ці запачаткавалі сябры і прыхільнікі БНФ.
Дзейнасць у Вярхоўным Савеце і органах мясцовага самакіравання Беларусі ў 90-я гады і працу па адраджэнні нацыянальна-культурнай спадчыны на ўсіх узроўнях. Напрыклад, пра працу ў Мінскім гарадскім савеце можна даведацца тут.
Ініцыяванне і арганізацыю масавых акцый, якія сталі традыцыйнымі ў незалежнай Беларусі, такіх як Дзяды, Чарнобыльскі шлях, адзначэнне 25 сакавіка і гадавіны Слуцкага збройнага чыну, у тым ліку маштабнага адзначэння стогадовага юбілею БНР у 2018 годзе.
Пачын у нацыянальным адраджэнні напрыканцы 80-х і працяг цягам 90-х і 2000-х, што прывяло да стварэння шматлікіх краязнаўчых, творчых, літаратурна-мастацкіх, экалагічных, праваабарончых арганізацый. Гэта, да прыкладу, Малады Фронт, Моладзь БНФ, Праваабарончы цэнтр "Вясна", цэнтр "Супольнасьць", Дзедзіч, Арт Сядзіба, Моладзь БНФ, Мара, Маладзік, Паходня, Контур, Шуманаўскае таварыства, Фонд імя Льва Сапегі, Цэнтр моладзевых ініцыятыў ды іншыя арганізацыі, суполкі і нефармальныя ініцыятывы па ўсёй Беларусі.
Ушанаванне памяці ахвяр камуністычных рэпрэсій і герояў барацьбы за нацыянальнае вызваленне Беларусі, уключна з усталяваннем крыжоў, знакаў памяці, правядзеннем мемарыяльных імпрэз ды вечарын.
Сядзібу БНФ у Менску – ад 1993 на вуліцы Варвашэні (цяпер прасп. Машэрава), а з 2011 па 2019 – на вуліцы Чарнышэўскага. Сядзіба была пляцоўкай вольнага грамадска-культурнага жыцця, дзе адбываліся тысячы прэзентацый, канцэртаў, творчых вечарын, выстаў (у тым ліку музыкі, якія знаходзіліся ў "чорных спісах" пад негалоснай забаронай на канцэртную дзейнасць, мелі тут магчымасць сустрэцца са сваімі слухачамі). Такую ж ролю інкубатара грамадзянскай культурніцкай актыўнасці адыгрывалі сядзібы арганізацыі ў іншых гарадах: Брэсце, Гродна, Слоніме, Магілёве і г.д.
Аднаўленне шматлікіх помнікаў гісторыі і культуры, а таксама ўсталяванне памятных знакаў ды шыльдаў у важных для беларускай гісторыі месцах.
Выданне газет, бюлетэней, брашур ды іншых друкаваных матэрыялаў самага рознага кшталту – ад улётак і бюлетэняў лакальных фронтаўскіх структур па ўсёй Беларусі, да "Навінаў БНФ", што былі адной з найпапулярнейшых незалежных газет канца 80-х пачатку 90-х.

Даведка:
Рэгістрацыя – 12.07.2017
Ліквідацыя – 22.07.2021
Рашэнне прынята: Мінскі гарвыканкам

Сацыяльна-творчая ўстанова «Цэнтр развіцця эфектыўнай камунікацыі "Жывая Бібліятэка"» займалася нефармальнай адукацыяй беларускай моладзі, беларускіх актывістаў_к, прадстаўнікоў_ніц стыгматызаваных і дыскрымінаваных груп, а таксама барацьбой са стэрэатыпамі, прасоўваннем каштоўнасцей роўнасці, недыскрымінацыі і разнастайнасці.

Дзякуй Жывой Бібліятэцы за:

50+ Жывых Бібліятэк, праведзеных у Мінску. 120+ Жывых Бібліятэк, праведзеных у іншых гарадах. 270+ чалавек, якія наведалі самую вялікую "Жывую Бібліятэку". 700+ Жывых Кніг. Жывая Бібліятэка – гэта незвычайная бібліятэка. Тут замест звыклых кніг выступаюць са сваімі гісторыямі людзі, гатовыя адказаць амаль на любое пытанне. Кніга – гэта чалавек, які валодае пэўнай ідэнтычнасцю, рэдкай прафесіяй, унікальным досведам, нязвыклым для "большасці" ладам жыцця або поглядамі на свет і які сутыкаецца са стэрэатыпамі. За 25-30 хвілін удзельнікі_цы "Жывой Бібліятэкі" даведваліся пра гісторыю іншага чалавека – Жывой Кнігі, і спрабавалі зразумець яе.
Даследаванне даступнасці публічных прастор Мінска для розных сацыяльных груп, якое было праведзена восенню 2018 з мэтай даведацца пра стан і прычыны (не)даступнасці розных месцаў у горадзе.
Праект RegiON (Уключаючы рэгіён), які стартаваў вясной 2020 як сумесная ініцыятыва Цэнтра і яго рэгіянальных партнёраў. Дзейнасць праекта была накіравана на прасоўванне скразных каштоўнасцей сярод моладзі з дапамогай розных фарматаў нефармальнай адукацыі. Поспехам было далучэнне моладзі да каманд лакальных партнёраў і яе актыўная дапамога ў арганізацыі наступных падзеяў. Праект паказаў, што займацца актывізмам можна і модна.
Ініцыятыву ALL Inclusive, якая пачалася восенню 2019 на аднайменным Форуме па абмене інклюзіўнымі практыкамі. Галоўнай мэтай ініцыятывы было прасоўванне інклюзіўных практык і падыходаў у дзейнасці арганізацый і ініцыятыў у Беларусі. У 2020 быў праведзены адукацыйны курс "ALL Inclusive", які быў накіраваны на практычную адукацыю ў сферы інклюзіўнага падыходу. Пасля навучання на курсе 18 з 19 удзельнікаў і ўдзельніц курса змянілі свае падыходы на больш інклюзіўныя. Было рэалізавана 12 міні-ініцыятыў з уцягваннем і/або ў падтрымку ўразлівых груп, якія ахапілі не менш за 165 прадстаўнікоў_ніц такіх груп.
Інфакампанію "COVID-19: Міфы VS Факты", мэтай якой было фармаванне праўдзівага ўяўлення пра COVID-19 і сродкі абароны ад яго сярод моладзі і людзей старэйшага ўзросту (60+), а таксама падтрымка людзей на самаізаляцыі падчас пандэміі. Асноўнымі напрамкамі работы ў праекце сталі стварэнне і распаўсюджванне паштовак з міфамі і фактамі аб новым каронавірусе, паштовак са словамі падтрымкі, а таксама артыкулаў, так ці інакш звязаных з тэмай каронавіруса і яго ўплывам на жыццё людзей. У выніку праекту: з'явілася 24 унікальных дызайна паштовак; больш за 8 тыс. чалавек даведаліся пра міфы і факты праз друкаваныя паштоўкі, адпраўленыя па пошце і пакінутыя ў грамадскіх месцах; больш за 2,2 тыс. чалавек прачыталі тэматычныя артыкулы на сайце арганізацыі; больш за 34 тыс. чалавек даведаліся пра кампанію.
Zero Discrimination Day/Week. У 2020 быў праведзены Zero Discrimination Day, у межах якога 7 беларускіх арганізацый правялі свае мерапрыемствы ў Мінску і Маладзечне: форум-тэатр, уводны курс па правах чалавека, прагляд фільма на тэму хатняга гвалту, арт-майстэрня, сацыяльная гульня, прагляд і абмеркаванне фільма «Кролик Джоджо», гульня пра дыскрымінацыю. У 2021 быў праведзены Zero Discrimination Week – Тыдзень нулявой дыскрымінацыі, на якім былі арганізаваныя: 21 імпрэза ў партнёрстве з 12 беларускімі арганізацыямі і ініцыятывамі. Тыдзень суправаджаўся інфакампаніяй у сацсетках і на сайце, якая ахапіла больш за 55 тыс. чалавек.
Настольную гульню "Веру – НеВеру", якая ўяўляе сабой набор з 50 картак з рознымі статыстычнымі фактамі пра Беларусь і нашае грамадства. Некаторыя з гэтых фактаў з'яўляюцца праўдай, некаторыя – не. Мэта гульні – даведацца больш пра грамадства Беларусі і пагаварыць пра існуючыя ў ім праблемы. Гуляць у яе могуць ад 2 да 20 чалавек як паасобку, так і камандамі, з працягласцю ад 1 да 50 раўндаў.
Базу інклюзіўных практык, якая з'явілася на сайце Цэнтра пасля рэалізацыі ініцыятывы ALL Inclusive у 2020. База змяшчае апісанне інклюзіўных падыходаў, якія ўжо былі ўкаранёны ў работу розных арганізацый як у Беларусі, так і за мяжой. У Базе 42 практыкі, якія падзелены па 20 катэгорыях уразлівых груп.

Даведка:
Рэгістрацыя – 29.12.1991
Ліквідацыя – 24.09.2021
Рашэнне прынята: Вярхоўны суд РБ
Суддзя: Р. І. Філіпчык

Міжнароднае грамадскае аб'яднанне "Згуртаванне беларусаў свету "Бацькаўшчына" дзейнічала ў двух буйных кірунках:
1. Супрацоўніцтва з беларускай дыяспарай (больш за 100 беларускіх арганізацый у 20 краінах свету), даследаванне і папулярызацыя здабыткаў беларусаў замежжа, дапамога ў наладжванні сувязяў з Радзімай, прыцягненне беларускай дыяспары для вырашэння грамадска-значных праблем у Беларусі, а таксама спрыянне больш актыўнаму ўдзелу беларусаў замежжа ў грамадскім жыцці Беларусі.
2. Каардынацыя і правядзенне агульнанацыянальнай грамадскай культурніцкай кампаніі "Будзьма беларусамі!" (з 2008 г.) па паглыбленні нацыянальнай ідэнтычнасці беларусаў на глебе дэмакратычных каштоўнасцяў. Кампанія працавала на шырокую мэтавую аўдыторыю.

Дзякуй ЗБС "Бацькаўшчыне" за:

Сем З'ездаў беларусаў свету, якія праходзілі кожныя 4 гады, пачынаючы з 1993.
Больш чым 50 унікальных кніг па гісторыі беларускай дыяспары.
Садзейнічанне ў аднаўленні копіі Крыжа Еўфрасінні Полацкай, які зараз захоўваецца ў Свята-Еўфрасіннеўскім манастыры ў Полацку.
Дапамогу асяродкам беларускай дыяспары ў правядзенні іх мерапрыемстваў.
Правядзенне ў межах кампаніі "Будзьма беларусамі" (з 2008) 4500 розных грамадскіх, культурніцкіх, асветніцкіх мерапрыемстваў, у тым ліку скіраваных на міжсектарнае супрацоўніцтва і актывізацыю ініцыятыў у рэгіёнах, у якіх узялі ўдзел каля 300 тысяч людзей з 220 беларускіх гарадоў і маленькіх вёсак. Кампанія аказала значны ўплыў у грамадстве, укараняючы дэмакратычны складнік у структуры нацыянальнай ідэнтычнасці беларусаў праз культуру, навучаючы і матывуючы людзей быць больш грамадска актыўнымі. За час працы кампаніі былі наладжаныя шматузроўневыя сувязі з дзеячамі і менеджарамі культуры, гісторыкамі, літаратарамі, музыкамі, інтэлектуаламі Беларусі, экспертамі з розных сфер. Досвед і напрацоўкі кампаніі актыўна выкарыстоўваліся іншымі грамадскімі ініцыятывамі, бізнес-асяродкамі, а таксама навучальнымі ўстановамі Беларусі.
Сайт кампаніі "Будзьма", які з 2019 быў перапрафіляваны ў медыярэсурс, які стаў для многіх беларусаў крыніцай унікальнай інфармацыі пра беларускую культуру і яе стваральнікаў.
7 фестываляў ADNAK, якія сталі сапраўднымі з'явамі ў сферы беларускамоўнай рэкламы і камунікацыі, добрай нагодай для пошуку і выяўлення беларускага крэатыўнага коду, пачаткам імклівага распаўсюджвання моды на беларускасць.
Анімацыйны фільм па гісторыі Беларусі "Будзьма беларусамі. Гісторыя Беларусі за 5 хвілін".
Музычны праект "У пошуках Цмока" сумесна з Тузінам Хітоў "Тузін. Перазагрузка".

Даведка:
Рэгістрацыя – 05.05.2020
Ліквідацыя – 14.07.2021
Рашэнне прынята: Гомельскі гарвыканкам

Прыватная экспертна-інфармацыйная ўстанова па падтрымцы актыўнасці гараджан у сферы ўрбаністыкі "Майстэрня гарадскіх даследаванняў" заангажоўвала ўрбаністаў і грамадскіх актывістаў у краязнаўчыя даследаванні і абарону гістарычнага асяроддзя гораду, а таксама папулярызавала гісторыю і краязнаўства сярод гараджанаў. Была створаная на аснове ініцыятывы "Пошукі старога Гомеля", якая існуе з 2015.

Дзякуй Майстэрні гарадскіх даследаванняў за:

Абарону ад забудовы гістарычнага цэнтра Гомеля. Былі спыненыя будоўлі: трох падземных пераходаў на галоўнай плошчы Гомеля, гандлёвага цэнтру на вуліцы Камісарава каля Ільінскай стараабрадніцкай царквы, пашырэнне гістарычнай вуліцы Пралетарскай і інш.
Стварэнне мультымедыйнай прадукцыі (3D візуалізацыі гістарычных будынкаў: касцёла, які размяшчаўся на цэнтральнай плошчы Гомеля, будынкаў аўтарства архітэктара Станіслава Шабунеўскага, вуліцы Мільённай – сёння Білецкага, мультфільм "Тысячагадовая гісторыя Гомеля", фільм "Рэпрэсаваная архітэктура").
Сайт "Драўляная спадчына Беларусі" – архіў драўлянай архітэктуры Беларусі, які можа папаўняць кожны ахвочы беларус.

Даведка:
Рэгістрацыя – 03.06.2010
Ліквідацыя – 29.05.2022
Рашэнне прынята: Агульны сход ЭКГА "Неруш"

Эколага-краязнаўчае грамадскае аб'яднанне "Неруш" заангажоўвала жыхароў рэгіёну ў шырокую краязнаўчую дзейнасць, арганізоўвала для іх імпрэзы, выставы, конкурсы. Займалася экалагічнай асветай моладзі.

Дзякуй ЭКГА "Неруш" за:

Выданне краязнаўчага бюлетэня "Альтанка" са студзеня 1999 да 2008. Усяго выйшла 16 нумароў. Матэрыялы бюлетэня былі прысвечаны рэгіянальная гісторыі і культуры. Друкаваліся толькі аўтарскія матэрыялы. Некалькі нумароў былі тэматычнымі: №2'2000 – "10 гадоў ТБМ імя Ф. Скарыны", №5-6'2000 – "Міхась Забэйда-Суміцкі", №7-8'2000 – "Памяць. Гонар. Слава. Ваенныя бітвы на тэрыторыі Баранавіцкага раёна", №2'2002 – "Беларускі спеўнік", №1'2008 – "210 год з дня нараджэння Адама Міцкевіча". Бюлетэнь выдаваўся накладам 299 асобнікаў, прызначаўся для шырокага кола чытачоў, якія цікавяцца краязнаўствам, і распаўсюджваўся па бібліятэках, установах адукацыі, у грамадскія арганізацыі.
Экалагічную і краязнаўчую асвету моладзі праз сацыяльныя сеткі і фотаконкурсы.
Арганізацыю Велафэстаў у рамках Еўрапейскага Тыдня Мабільнасці ў горадзе Баранавічы ў верасні 2016 і 2018, а таксама ў рамках Дня горада Баранавічы ў мае 2019.
Арганізацыю разам з Баранавіцкім райвыканкамам прыпынка "Экспрэс-ААН" у Баранавічах у кастрычніку 2015, калі ў музеі-сядзібе "Завоссе" адбылася прэзентацыя турыстычнай дэстынацыі "Зялёнае кола Баранавіч".
Фестывалі аграэкатурызму: "Кузевічы-2009", які наведала каля 400 чалавек, і "Кузевічы-2010" – каля 650 чалавек. На фестывалях прайшлі прэзентацыя турыстычных магчымасцяў Баранавіцкага рэгіёна, майстар-класы традыцыйных рамёстваў, выставы прадукцыі з прыродных матэрыялаў, канцэртныя праграмы як самадзейных, так і прафесійных артыстаў.
Даследаванне і добраўпарадкаванне крыніц у Баранавіцкім раёне ў перыяд 2016-2021, дзе было даследавана 62 крыніцы, з іх 22 добраўпарадкаваны і аформлены інфармацыйнымі таблічкамі з QR-кодам.

Даведка:
Рэгістрацыя – 26.11.1999
Ліквідацыя – 29.10.2021
Рашэнне прынята: Мінскі абласны суд
Суддзя: А. Е. Кульбіцкая

Барысаўскае жаночае сацыяльнае грамадскае аб'яднанне "Правінцыя" прасоўвала інтарэсы жанчын і клапацілася пра тых з іх, хто пацярпелі ад хатняга гвалту; займалася захаваннем і папулярызацыяй спадчыны праз арганізацыю фестываляў, пленэраў. Арганізацыя падтрымлівала людзей сталага ўзросту, былых вязняў канцлагераў, каб палепшыць якасць іх жыцця: арганізоўвала для старэйшых людзей святочныя мерапрыемствы, а таксама дапамагала сем'ям даглядаць хворых састарэлых людзей, якія ўжо не ў стане самастойна выходзіць з дому. "Правінцыя" таксама спрыяла развіцьцю творчых і дзелавых якасцей маладых ініцыятыўных і энергічных жанчын.

Дзякуй БЖСГА "Правінцыя" за:

6 фестываляў "Бярозаўская сербіянка", якія праходзілі амаль штогод пачынаючы з 2011 у Бярозаўскім раёне. У фэстах прымалі ўдзел фальклорныя калектывы Бярозаўскага, Кобрынскага, Івацэвіцкага, Драгічынскага раёнаў. У кожным фэсце ўдзельнічалі да 40 выканаўцаў.
2 пленэры з выставамі, у якіх удзельнічалі Мікола Купава, Аляксандр Шатэрнік, а таксама іншыя вядомыя і менш вядомыя мастакі і майстры.
Святкаванне Купалля тры гады запар у вёсцы Седаўшчына Бярозаўскага раёна, якое збірала ля вогнішча каля 40 чалавек.
Жаночую крызісную лінію, якая працавала больш за 15 год і праз якую больш за 250 жанчын, пацярпелых ад хатняга гвалту, атрымалі сацыяльную, інфармацыйную, прававую і маральную падтрымку.
Кватэру-сховішча, дзе падчас эпідэміі кавіду пражывалі жанчыны і іх дзеці, якія збеглі з дому, хаваючыся ад гвалту.
Школу жаночага ментарства "Драбінка", якая дала больш чым 50 жанчынам веды і натхненне для прасоўвання сваіх творчых, сацыяльных, адукацыйных і бізнес-праектаў.
Штогадовыя моладзевыя 10-дзённыя летнікі, якія праходзілі 13 год запар і ў якіх за гэты час узялі ўдзел больш за 200 маладзёнаў.
Праграму рэабілітацыі людзей, якія паехалі працаваць за мяжу і сталі ахвярамі эксплуатацыі. За 15 год "Правінцыя" дапамагла больш чым 150 людзям атрымаць прафесію, прайсці медыцынскае абследаванне, сабраць дзяцей у школу і г.д.
Натхненне для жыхароў цэлага мікрараёна ў горадзе Бяроза: дзякуючы таленавітай арганізацыі жыхары Бярозы разам аднавілі стадыён і зрабілі яго ўтульным і камфортным месцам для адпачынку і спартыўных гульняў.

Даведка:
Рэгістрацыя – 19.04.2000
Ліквідацыя – 21.12.2021
Рашэнне прынята: Верхнядзвінскі выканкам

Верхнядзвінская раённая арганізацыя ГА "Таварыства беларускай мовы імя Ф. Скарыны" была пляцоўкай, якая аб'ядноўвала ўсе мясцовыя арганізацыі і ініцыятывы. Яна заангажоўвала мясцовых настаўнікаў, работнікаў культуры, грамадскіх актывістаў-прыхільнікаў роднай мовы і культуры ў дзейнасць па папулярызацыі роднай мовы, культуры і гісторыі Верхнядзвінскага краю.

Дзякуй Цэнтру "Рубон" за:

Сустрэчы з вядомымі пісьменнікамі, паэтамі, навукоўцамі, мастакамі краіны, вядомымі творчымі асобамі вобласці і рэгіену.
Штомесячны бюлетэнь "Рубон" і штотыдневы дадатак да газеты "Рабочы" – "Рабочы Дзвінскага памежжа".
Песенны конкурс сярод дзяцей "Галасы будучыні".
Штогадовае святкаванне Дня роднай мовы.
Абласны пленэр "На хвалях натхнення".
Прэзентацыі выданняў вядомых пісьменнікаў, паэтаў, археолагаў.
Свята вуліцы Першамайскай горада Верхнядзвінска.
Добраўпарадкаванне помнікаў і гістарычных мясцін, вандроўкі.
Апекаванне 2-х дзіцячыя пляцовак у горадзе, дзе пасадзілі дрэвы, устанавілі альтанку, зрабілі домікі для птушак.
Выданне 3-х буклетаў пра шырока вядомых за межамі краіны людзей раёна.
Сацсеткі на АК, ВК, ФБ.
Рубрыку ў кожным нумары газеты ТБМ "Наша слова" з матэрыяламі пра справы верхнядзвінскіх грамадскіх актывістаў.
Матэрыялы пра справы грамадскіх актывістаў у мясцовым друку.
Сяброўства з грамадскімі арганізацыямі і актывістамі вобласці.
Вялікі архіў фотаматэрыялаў пра дзейнасць арганізацыі.

Даведка:
Рэгістрацыя – 28.10.1991
Ліквідацыя – 01.10.2021
Рашэнне прынята: Вярхоўны суд РБ
Суддзя: І. Г. Мільто

ГА "Саюз беларускіх пісьменнікаў" накіроўваў сваю дзейнасць на павышэнне кампетэнцый, абарону і рэалізацыю правоў беларускіх літаратараў і творцаў, рэпрэзентацыю і прамоцыю беларускай літаратуры, кніжнай культуры, чытання.

Дзякуй СБП за:

Стральцоўскі паэтычны фэст "Вершы на асфальце". Найбуйнейшы паэтычны фестываль Беларусі, які адбываўся ў Мінску штогод у 2012-2021 гг. пры партнёрстве амбасадаў краін, культурных інстытуцый краін Еўропы, збіраў паэтаў Беларусі, Украіны, Польшчы, Балтыі і далёкага замежжа.
Часопіс "Дзеяслоў". Выдаваўся з 2002 года раз на два месяцы, і аб'ядноўваў дзясяткі літаратараў, перакладчыкаў, крытыкаў, эсэістаў – адзіны незалежны літаратурны часопіс у Беларусі. Выйшла 119 нумароў. Наклад 500 ас.
Газету "Літаратурная Беларусь". Запачаткаваная ў 2007 годзе як штомесячны дадатак, выходзіла пры газеце "Новы Час", пасля закрыцця якой перайшла ў анлайн-фармат як асобнае СМІ. Выйшла 193 нумары.
Адукацыйны праект "Школа маладога літаратара". Больш за 250 выпускнікоў, якія прайшлі гадавы лекцыйна-практычны курс Школы. Дзясяткі з іх сталі лаўрэатамі літаратурных прэмій, выдаюць кнігі, актыўна працуюць у літаратуры. У асобныя гады на 20 месцаў у Школе прэтэндавала 120 заявак ад маладых літаратараў.
Літаратурны конкурс для моладзі "Экслібрыс". Праводзіўся з 2012 года як конкурс на найлепшы твор. Сярод лаўрэатаў – Крысціна Бандурына, Вольга Гапеева, Сярж Мядзведзеў, Антон Рудак, Ганна Севярынец, Антось Уласенка.
Кніжныя серыі "Кнігарня пісьменніка", "Каляровы ровар", "Пункт адліку", "Прайдзісвет. Postscriptum".
Рэгіянальныя абласныя альманахі "Жырандоля" (Брэст), "Палац" (Гомель), "Новы замак" (Гродна), "Ратуша" (Віцебск), "Брама" (Магілёў).
Юрыдычныя кансультацыі па аўтарскім праве.
Праект у справе прамоцыі беларускай літаратуры за мяжой Books from Belarus.
Youtube-праект "Кантэкст". Заснаваны як альтэрнатыва сустрэч з літаратарамі ў часы пандэміі каранавіруса COVID-19, працягнуў сваю працу пасля фактычнай ліквідацыі літаратурнай прасторы ў Беларусі ў пачатку 2020-х гадоў. На сёння запісана і выкладзена 58 інтэрв'ю і літаратурных выступаў беларускіх пісьменнікаў.
Інтэрнэт-сайт lit-bel.org, які акумуляваў працу па ўсіх кірунках дзейнасці арганізацыі, ажыццяўляў камунікацыю з аўтарамі і чытачамі, інфармаваў пра мінулыя падзеі і анансаваў новыя мерапрыемствы з удзелам больш як 450 сябраў пісьменніцкай арганізацыі.
Сацыяльныя сеткі "Саюз беларускіх пісьменнікаў" (5000+ падпісчыкаў).
Актыўны ўдзел у працы European Writers Council, Baltic Writers Council, Eurozine Network.

Даведка:
Рэгістрацыя – 21.11.1991
Ліквідацыя – 08.11.2021
Рашэнне прынята: Вярхоўны Суд РБ

Грамадскае аб'яднанне "Таварыства беларускай мовы імя Францішка Скарыны" падтрымлівала і развівала беларускую мову ва ўсіх сферах грамадскага жыцця: у адукацыі, культуры, СМІ і г.д. на карысць усіх грамадзян Беларусі.

Дзякуй ТБМ за:

Агульнанацыянальную дыктоўку на беларускай мове.
Газету "Наша слова", якая штотыдзень выходзіла з сакавіка 1990.
Заснаванне газеты "Новы час" (25 сакавіка 2002). Да 2007 газета выходзіла два разы на месяц, потым стала штотыднёвай.
Заснаванне Гуманітарнага ліцэя імя Якуба Коласа (1 верасня 1998). У 2003 Міністэрства адукацыі ліквідавала ліцэй, але дэ-факта ён захаваўся. Толькі ў 2004—2016 гадах ліцэй закончыла больш за 200 чалавек.
Заснаванне Універсітэта імя Ніла Гілевіча 15 сакавіка 2018.
23 нумары часопіса "Верасень", якія выходзілі з 2009 па 2020.
Паспяховую ініцыятыву па стварэнні гімназіі з беларускай мовай навучання ў цэнтры сталіцы (гімназія №23).
Шмат розных кніг і выданняў, якія выдаваліся ТБМ-аўцамі цягам звыш трыццаці гадоў у розных мястэчках і гарадах нашай краіны.
Абарону правоў грамадзян у карыстанні роднай беларускай мовай у розных сферах: адукацыі, банкаўскай, прававой і інш.

Даведка:
Рэгістрацыя – 30.03.1998
Ліквідацыя – 15.09.2021
Рашэнне прынята: Гомельскі абласны суд
Суддзя: Т. Я. Аземша

Гомельская маладзëвая краязнаўчая грамадская арганізацыя "Талака" давала магчымасць моладзі Гомеля і яго ваколіцаў, зацікаўленай у вывучэнні, шанаванні ды захаванні гісторыі і культуры рэгіёну, праявіць сябе ды заявіць пра сябе. Арганізацыя займалася папулярызацыяй сярод моладзі беларускай нацыянальнай культуры і гісторыі, ды краязнаўчай дзейнасцю – што спрыяла нацыянальнаму адраджэнню Беларусі і пабудове дэмакратычнага грамадства.

Дзякуй ГМКГА "Талака" за:

Такіх вядомым асобаў, як: Зміцер Сасноўскі (лідар гурта "Стары Ольса"), Сяргей Дубавец і Таццяна Сапач (беларускія журналісты), Барыс Сачанка (пісьменнік), Алесь Яўсеенка, Алесь Бяляцкі (праваабаронцы), Вальжына Цярэшчанка (бард), Пятро Цалка (дырэктар "Веткаўскага музея Стараабрадніцтва і беларускіх традыцый") ды іншыя.
Вялізны аўдыя-, відэа- і фота- архіў па выніках штогадовых экспедыцый арганізацыі. Асобныя артыкулы па экспедыцыях захоўваюцца на сайце "Наш край".
Рэгулярныя рэканструкцыі традыцыйных абрадаў Гомельшчыны: Каляды, Гуканне Вясны, Купалле, Жаніцьба Коміна.
Мультфільмы на беларускай мове для дзетак: "Мульт пра вяселле" і "А што ў лузе".
Штогадовыя паездкі ў вёскі Гомельшчыны для папулярызацыі ды падтрымкі абрадаў, якія ладзяцца мясцовымі: Пахаванне Стралы, Ваджэнне Сулы, Юр'я, Жаніцьба Коміна ды іншыя.
Змаганне за драўляную спадчыну Гомеля, спробы наладзіць узаемадзеянне з гарадскімі ўладамі, распрацоўку "крытычнай мапы гораду" ды іншыя ўрбаністычныя праекты.
Запіс музычнага альбому "А што ў лузе?".

Даведка:
Рэгістрацыя – 09.09.1997
Ліквідацыя – 03.09.2021
Рашэнне прынята: Гарадзенскі абласны суд
Суддзя: Л. А. Малючок

Грамадскае аб'яднанне "Цэнтр інфармацыйнай падтрымкі грамадскіх ініцыятыў "Трэці сектар" – заангажоўвала прадстаўнікоў грамадскіх ініцыятыў, журналістаў, сталых людзей, актывістаў мясцовых супольнасцяў у культурніцкую дзейнасць, займалася захаваннем і папулярызацыяй культурнай і гістарычнай спадчыны, падтрымкай культурніцкіх ініцыятыў.

Дзякуй Цэнтру "Трэці сектар" за:

Праграму "Культура і спадчына", у межах якой былі выдадзеныя такія кнігі і выданні як "Песьня пра Зубра", "Легенды і міфы", "Ад Нёмана да Буга", "Традыцыйная кухня Беласточчыны і Гарадзеншчыны".
Відэаблог "Постаці", прысвечаны людзям, якія зрабілі вялікі ўнёсак у захаванне гістарычнай і культурнай спадчыны. Блог атрымаў дыплом на 4-м Фестывалі нефармальнай адукацыі ў Мінску 7-9 снежня 2012.
Праект "Новы свет", прысвечаны захаванні ўнікальнага мікрараёна Гродна.
"Універсітэт Залатога Веку", які з 2010 скончыла больш за 1000 чалавек. У межах Універсітэта рэгулярна працавалі курсы і клубы "Беларускія вячоркі", хор "УЗВышша", "Гарадзеншчына літаратурная", "Наш Радавод", "Гісторыя Беларусі", "Падарожжы ў часе і прасторы", тэатральная студыя і іншыя культурніцкія курсы.
Курсы "Мову Нанова", якая некалькі год працавала ў Гродна ў памяшканнях Цэнтра.
Выданні, прысвечаныя вуснай гісторыі, "Гісторыя ХХ ст. ва ўспамінах гарадзенцаў", "Мапа ўспамінаў гарадзенцаў".
"Жывыя бібліятэкі" ў Гродна, героямі якіх часта былі людзі, якія папулярызавалі беларускую гісторыю і культуру.
Трансгранічную Школу аніматараў культуры ў Супраслі.
Гарадзенскія паэтычныя слэмы.
Рэгулярную інфармацыйную падтрымку разнастайных культурніцкіх праектаў і акцыяў у Гродна, дапамогу ва ўмацаванні патэнцыялу культурніцкіх ініцыятыў праз трэнінгі, школы, праекты, стажыроўкі, абмены.

Даведка:
Рэгістрацыя – 11.08.1992
Ліквідацыя – 20.08.2021
Рашэнне прынята: Вярхоўны суд РБ
Суддзя: І. В. Калеснік

Асветніцкае грамадскае аб'яднанне "Фонд імя Льва Сапегі" накіроўвала сваю дзейнасць на актывістаў грамадскіх арганізацый, палітычных партый, грамадскіх рухаў і ініцыятыў; студэнтаў і выкладчыкаў ВНУ, школьных настаўнікаў, навукоўцаў – гісторыкаў, юрыстаў, эканамістаў, філолагаў, сацыёлагаў, эколагаў і супрацоўнікаў устаноў культуры, а таксама дэпутатаў Саветаў і спецыялістаў выканкамаў. Арганізацыя займалася падтрымкай культурна-гістарычных мерапрыемстваў, друку навукова-гістарычных і культурніцкіх выданняў і ўласнае выданне падобнай літаратуры (кнігі, брашуры, календары, плакаты і г.д.). Захаваннем культурных традыцый і гістарычнай спадчыны. Правядзеннем фальклорна-гістарычных святаў, навукова-гістарычных чытанняў, гісторыка-культурных канферэнцый, культурніцкіх фестываляў і выставаў, семінараў, трэнінгаў, стажыровак, экспертнай дзейнасці і кансалтынгу.

Дзякуй Фонду імя Льва Сапегі за:

Падрыхтоўку і выданне двух графічных каляровых альбомаў з партрэтамі: "Дзеячы гісторыі Беларусі" (у т.л. Вялікія князі – Міндоўг, Гедзімін, Альгерд, Кейстут, Ягайла і Вітаўт, выбітныя ваяры – Канстанцін Астрожскі і Юрый Радзівіл "Геркулес", канцлеры ВКЛ – Мікалай Радзівіл "Чорны", Астафій Валовіч і Леў Сапега, вялікі князь і кароль Жыгімонт ІІ Аўгуст і яго жонка – каралева Барбара Радзівіл, нацыянальныя героі – Тадэвуш Касцюшка і Кастусь Каліноўскі і г.д.) і "Дзеячы культуры Беларусі" (у т.л. Еўфрасіння Полацкая і Кірыла Тураўскі, Францішак Скарына і Мікола Гусоўскі, Сымон Будны і Васіль Цяпінскі, Сімеон Полацкі і Мялецій Сматрыцкі, Ілля Капіевіч і Казімір Семяновіч, Міхал Казімір Агінскі і Адам Міцкевіч і г.д.).
Сёння гэтыя партрэты змешчаны ва ўсіх падручніках для школ, гімназій і ліцэяў.

Падрыхтоўку і выданне шэрагу навукова-папулярных даследаванняў пра канцлера ВКЛ Льва Сапегу.
Дапамогу ў падрыхтоўцы і выданні кнігі Анатоля Цітова "Геральдыка Беларусі".
Падрыхтоўку і правядзенне міжнароднай навуковай канферэнцыі "Релігійная талеранцыя ў Беларусі".
Спрыянне ўсталяванню помніка Льву Сапегу ў Слоніме і ў Астроўне.
Спрыянне рэалізацыі праектаў пашырэння грамадзянскага ўдзелу на мясцовым узроўні ў межах праграмы TANDEM:

- "Нявесцін камень" і "Стварэнне музея, прысвечанага аб'екту ЮНЕСКА – Дуга Струвэ" ў Ашмянскім р-не,
- "Вяртанне да вытокаў" у Слонімскім р-не,
- "Аднаўленне культурнай каштоўнасці – парка ХІХ ст." у Жлобінскім р-не,
- "Аднаўленне гістарычнага парка "Бяльмонт" у Браслаўскім р-не ды шмат інш.

Даведка:
Рэгістрацыя – 18.09.2013
Ліквідацыя – 22.06.2022
Рашэнне прынята: ГУЮ Брэсцкага аблвыканкама

Мясцовы дабрачынны "Фонд развіцця Брэсцкай крэпасці" займаўся кансалідацыяй і развіццём супольнасці людзей, зацікаўленых у захаванні спадчыны, аб'ядноўваў намаганні міжнародных экспертаў у галіне вывучэння спадчыны Брэста і Брэсцкай крэпасці, ініцыяваў архіўныя даследаванні, папулярызаваў гісторыю аб спадчыне ў новых сучасных фарматах, працаваў з дыгіталізацыяй ведаў.

Дзякуй Фонду развіцця Брэсцкай крэпасці за:

Распрацоўку новага веламаршрута з мабільным дадаткам "VeloFort" па фортах Брэсцкай крэпасці ў Беларусі і Польшчы;
Атлас крэпасці Брэст-Літоўск – шматтомны выдавецкі праект Фонду. Два тамы аб'ядналі найбуйнейшыя архівы трох краін, яны ўпершыню змяшчаюць сотні матэрыялаў па ранніх перыядах гісторыі Брэста і крэпасці без ідэалогіі.
Базу дадзеных brestdatabase.by – інфармацыйна-аналітычная платформу, якая аб'ядноўвае рэдкія матэрыялы (архіўныя дакументы, карты, планы, чарцяжы з Беларусі, Польшчы, Расеі, Літвы) у лічбавым выглядзе для ўсіх кірункаў незалежных даследчыкаў.
Друкаваны нефармальны гід "From Brest with love" і турыстычную карту Брэста.
Канцэпцыю захавання і развіцця тэрыторый Брэсцкай крэпасці (захаванне, інфраструктура, новыя маршруты, музеі і аб'екты турызму, графік рэалізацыі), 2013 г.

Каб дадаць сваю арганізацыю на старонку, калі ласка, дашліце апісанне Вашай арганізацыі праз форму зваротнай сувязі

Дасылаючы свае дадзеныя Вы згаджаецеся на іх захоўванне і апрацоўку з мэтай стварэння атрыкула Каталога. Дадзеныя будуць выдаленыя не пазней, чым праз месяц пасля іх апрацоўкі.